A Igrexa de Santo André conta con obras e ampliacións de diferentes épocas, pero probablemente o seu elemento máis destacado sexa a capela sur, denominada de Riobóo, edificada en 1686 por Francisco Seixas e Losada, naquel tempo arcebispo de Santiago de Compostela e benfeitor da parroquia. Nos muros exteriores pódese ver un fermoso escudo labrado de pedra coas armas da familia construtora: as cinco pombas dos Seixas; a torre dos Riobóo; a lousa esmagando a dous lagartos dos Losada e a árbore dos Piñeiro.

O mesmo brasón aparece tamén na fachada da Casa Grande de Santo André, que foi a residencia principal dos Seixas e localízase moi próximo ao templo, separado apenas pola estrada AC-141.

Outro elemento de interese da igrexa é a súa torre barroca de tres corpos, rematada nun campanario con campás de 1842 e 1913.

Parroquia: Santo André de Cabanas

Lugar: Cabanas

Coordenadas: 43.41861, -8.16143.

Acceso: Desde a N-651 chégase ao templo pola estrada AC-141 en dirección leste. A igrexa está a man dereita da estrada a 100 metros da casa do Concello.

Accesibilidade: Dispón dunha área de estacionamento de vehículos ao carón da estrada AC-141.

Puntos fortes: Templo vinculado á veciña Casa Grande de Santo André que conta cun dos máis artísticos escudos de armas da comarca.

Puntos débiles: O templo e o adro permanecen pechados excepto durante os exercicios relixiosos.