É unha igrexa dunha soa nave coa parte máis antiga na cabeceira, de estilo renacentista. A nave e a fachada son barrocas e foron edificadas entre 1759 e 1760 grazas á achega económica do arcebispo de Santiago de Compostela, Bartolomé Rajoy y Losada. O seu elemento máis destacado é a fermosa porta barroca, obra dos irmáns Alberto e Melchor Ricoy, cun frontón no que se aprecia a figura de San Martiño a cabalo compartindo a súa capa cun mendigo. A portada remata no alto cunha espadana, tamén barroca, con dúas campás fabricadas en 1807 e 1903 respectivamente. Accédese ao campanario a través dun balcón redondo e unha escalinata situados no lado sur do edificio.

Na zona traseira do templo, polo lado leste localízase o cemiterio parroquial.

Parroquia: San Martiño de Porto

Lugar: O Chao da Aldea

Coordenadas: 43.42309, -8.17513. 

Acceso: Chégase á igrexa parroquial desde a estrada N-651, collendo o desvío en dirección oeste pola estrada AC-122. Despois de 800 metros o templo atópase ao carón da estrada a man dereita.

Accesibilidade: Pode accederse en vehículo ata a zona de estacionamento situada detrás do cemiterio parroquial.

Puntos fortes: É unha das xoias barrocas do concello de Cabanas.

Puntos débiles: O templo permanece pechado excepto durante os exercicios relixiosos.