Edificio do século XIX de planta rectangular, cun pequeno corpo engadido ao carón da ábsida, que funciona como sancristía. De grande sinxeleza formal, a maior parte da decoración concéntrase na fachada que se remata cunha espadana de dúas campás, feitas en 1872 e 1928.

O elemento máis sobresaínte do templo é un sepulcro situado no interior, no muro norte baixo un arco de medio punto, coa figura do defunto en posición orante, vestido con hábito e unha faltriqueira colgada do cinto. Unha inscrición revela que alí foi enterrado Frei Hodemio da Mariña, clérigo da mesma igrexa, finado en 1536. Esta data permite deducir a existencia dun edificio anterior, probablemente de orixe medieval. A tumba foi descuberta por dous veciños, Juan Fabal e José Díaz, despois dunhas obras de restauración.

Parroquia: Santo Estevo de Irís

Lugar: A Igrexa

Coordenadas: 43.42523, -8.14608.

Acceso: Saíndo desde a marxe dereita da ponte sobre o río Eume, tómase a estrada AC-564 en dirección nordeste. Despois de dous quilómetros e medio vírase á dereita no lugar polo chamado camiño do Foxo que pasa polo lugar da Caneta e xusto despois chégase á igrexa parroquial de Irís.

Accesibilidade: Pódese chegar en vehículo ata uns metros antes da Igrexa de Irís.

Puntos fortes: O sartego de Frei Hodemio da Mariña.

Puntos débiles: O templo permanece pechado excepto durante os exercicios relixiosos.

.