Desde a parroquia de Santa Olaia de Soaserra o acceso ao Parque Natural das Fragas do Eume realizase a través da ruta de sendeirismo circular Soaserra-Mosteiro de Caaveiro de 13 quilómetros. O itinerario comeza ao pé da igrexa parroquial de Soaserra, ao carón dunha fonte e lavadoiro para atravesar pouco despois o rego da Igrexa por unha ponte de madeira e continuar cara a Xavariz.
Xavariz é un dos núcleos máis antigos do Concello de Cabanas, documentándose xa nos séculos X e XI co nome de Xavarit, e formando parte desde os primeiros tempos do territorio do Couto do Mosteiro de San Xoán de Caaveiro. Esta poboación conta cun interesante conxunto de construcións tradicionais e especialmente de hórreos da tipoloxía local, estreitos, con cámara de madeira e tellado a dúas augas.
Desde o final do núcleo de Xavariz sae unha pista forestal que con acusada pendente vaise achegando ata a ribeira do Eume para compartir trazado coa “Ruta dos Encomendeiros” despois de tres quilómetros. O itinerario conduce ata o mosteiro de Caaveiro e volve de novo a Xavariz, para rematar finalmente na contorna da parroquial de Soaserra.
Parroquia: Santa Olaia de Soaserra
Lugar: Xavariz
Coordenadas: 43.422421, -8.094272.
Acceso: Existen dúas posibilidades de entrar ao Parque Natural das Fragas do Eume desde Soaserra. A primeira chegando ata a Igrexa parroquial de Soaserra e tomando o camiño de terra que sae uns metros máis abaixo do templo. A outra opción é comezar máis adiante do templo, xa no lugar de Xavariz de onde sae unha pista forestal en dirección sur que se adentra no parque.
Ligazón á ruta de Soaserra: https://cabanas.gal/roteiro-de-soaserra-ao-mosteiro-de-caaveiro/
Accesibilidade: Pódese deixar o vehículo no aparcamento da igrexa parroquial de Soaserra. O resto do percorrido deberá facerse a pé.
Puntos fortes: Ruta de grande beleza paisaxística polas beiras do río Eume.
Puntos débiles: Os primeiros tres quilómetros e os últimos da ruta que permite acceder ao parque Natural das Fragas do Eume posúen unha acusada pendente.
