O templo parroquial de San Mamede de Laraxe é un sinxelo edificio barroco, dunha soa nave e con espadana central. No interior, no lado norte, hai unha capela dedicada a San Barilán cun altar pétreo de estilo renacentista e nun dos seus muros apréciase unha inscrición sinalando a súa construción no ano 1601 por Agustín Vaz.

No exterior, ten grande interese o cemiterio parroquial construído en 1921. Conta cun portal realizado con ferro de forxa e algúns dos panteóns máis antigos están artisticamente decorados na súa parte superior con motivos de rosáceas, cálices e unha ponte, inspirada probablemente na que cruza o Eume.

Ao carón do cemiterio hai tamén unha curiosa fonte de pedra coroada cun frontón semicircular onde se aprecia unha cruz en relevo.

Parroquia: San Mamede de Laraxe.

Lugar: Areal

Coordenadas: 43.43725, -8.15407.

Acceso: Saíndo desde a marxe dereita da ponte sobre o río Eume, tómase a estrada N-651 en dirección norte. Despois de 4,6 quilómetros a igrexa e o camposanto están a man esquerda da vía.

Accesibilidade: Pódese chegar en vehículo ata a porta do adro da igrexa de Laraxe.

Puntos fortes: Forma un interesante conxunto patrimonial xunto co cemiterio parroquial e a fonte de pedra.

Puntos débiles: O templo permanece pechado excepto durante os exercicios relixiosos.