En Irís, a 200 metros da igrexa de parroquial de Santo Estevo, á altura do núcleo de Traseiras, mesmo nun pequeno ancheamento da estrada atópase un dos mellores miradoiros sobre o río Eume, xa no seu último tramo, despois de atravesar o Parque Natural das Fragas do Eume e antes de chegar á desembocadura.

Trátase dunha zona onde a corrente baixa formando meandros e as augas mudan o seu caudal en función das mareas, cambiando tamén a percepción da paisaxe segundo o momento do día. Desde este punto apréciase no horizonte o núcleo de Pontedeume, o monte Bréamo e o castelo da Nogueirosa.

Unha lenda conta que, no momento da creación, Deus enviou aos ríos da serra do Xistral por diferentes ladeiras coa promesa de que o primeiro en chegar ao mar recibiría cada ano un home como ofrenda. O Eume debía regar as terras do poñente, o Landro o norte e o Masma levaba as súas augas ao nacente. Os tres pactaron facer o camiño e chegar ao mesmo tempo, pero nun descanso, o Eume decatouse que só el cumprira o acordo e decidiu acelerar o paso das súas augas creando un curso agreste, cheo de saltos e gañando finalmente o reto ao conseguir chegar primeiro.

Parroquia: Santo Estevo de Irís

Lugar: Traseiras

Coordenadas: 43.424118, -8.143565.

Acceso: Chegase ao miradoiro pola estrada que atravesa Irís desde a igrexa parroquial de Santo Estevo, a 200 metros en dirección leste cara ao Parque Natural das Fragas do Eume.

Accesibilidade: Pódese acceder ata o miradoiro en vehículo xa que se sitúa nun lateral da estrada, pero non é posible estacionar no lugar.

Puntos fortes: É un dos mellores miradoiros sobre o tramo final do río Eume.

Puntos débiles: Non é posible estacionar no miradoiro..